Damien dir nou ki selebre nou diferans li koumanse par aksepte nou mem kouma nou ete.

Damien inn aprann viv avek so diferans san less parol dimounn afekte li. Damien krwar ki si pou twa li normal, li pou vinn normal pou lezot dimounn osi. Alor pa bizin per, pa bizin kasiet.

Namrata inn pran boukou kouraz pou sirmont regar lasosiete akoz so vitiligo.

Me zordi so mesaz li adress li avek boukou fierte. Kot linn arive zordi, se gras a so diferans kinn ofer li boukou posibilite. A traver so zistwar linn anvi ankouraz lezot pou repouss zot limit ek viz touzour pli lwin dan zot lavi malgre zot diferans.

Ameegah krwar ki nou diferans forz nou karakter, ki li pouss nou akonplir bann zoli zafer.

Li ti ena enn rev e linn reisi realiz li, e sa parski dimounn pann ziz li lor so diferans. O kontrer, se so talan kinn fer li arive. So zistwar montre ki nou bizin pa bess lebra, e kontign persevere. Parski nou diferans, li pa enn baryer ki anpes nou realiz nou bann rev ek lanbision.

Rebel, for, epanwi, tousala se Sheetal depi ki linn aksepte so diferans.

Regar ki lasosiete ena lor sor seve nepli ena okenn lefe lor so perseption " bote ". Parski so diferans, se enn vre kado, ek lavi tro kourt pou perdi letan ekout bann kritik e fer bann zizman. Ziska zordi, li santi li bien kouma li ete avek so seve natirel, e li ankouraz lezot ki kouma li pou fer parey parski li enn zafer normal.

So bann limit inn vinn bann oportinite.

Pou Jean-François, sak obstak ki li zwenn fer li realize ki ena ankor pli zoli pe arive divan.

Malgre seki dimounn kapav panse lor li, linn res touzour enn vre konbatan, enn imin ki ranpli avek volonte, potansiel ek rev. Li'nn desid swiv so prop definision sikse. So lobzektif : sanz bann mantalite ek inspir lezot pou persevere malgre zot andikap.

Sandrine ek Faimano, se de leker ki fi’nn zwenn e kinn less deryer zot tou bann prezize pou viv zot lamour. Zordi, zot pe kontign partaz zot zistwar avek fierte pou inspir bann lezot koup kouma zot. Parski tou dimounn merit respe e lamour.

Trwa mo pou definir Krish : determine, fier ek pasione.

Krish se enn personaz kinn desid pou viv so diferans malgre regar lasosiete. Kan li danse, kan li pe virvolte lor bann talon egwiy, pena personn ki kapav aret li. So deviz se " Pa less dimoun dir twa ki TO kapav fer ". A traver so zistwar, li anvi montre ki bann rev pena limit, ki nou bizin fer seki nou kontan, ek aret ekout dimounn.

Krish, enn gran danser avek so talon. 

Wi, malgre ki li enn garson, linn fer sa vinn so pasion e zordi, li ena so prop konpani kot li pe form bann lezot danser. Sa disiplinn-la permet li exprim so bann lemosion. Kan li dans dan talon, li santi ki personn pa kav tous li ou aret li. So mesaz : pa perdi lespwar, pa ekout dimounn ek les sakenn viv kouma li le. 

Zame li ti panse ki li ti pou ariv ziska-la, me zordi se avek fierte ki li pe selebre so diferans, so talan inik, so pasion. 

Depi ladolesans, Sheetal tinn koumans gagn seve blan, e boukou dimounn ki ti trouv sa bizar ti’nn fer li remark-sa. Me li ti pe dir ki li pran sa plito kouma enn sign matirite e non pa enn konplex.

Zordi laz 32 an, so kouler seve inn vinn ankor pli visib, me li santi li bien kouma li ete, malgre bann regar ek komanter. Li krwar ki se enn diferans ki nou tou bizin kapav aksepte. Ek ziska zordi, Sheetal inn gard so seve natirel pou ed lezot dimounn kouma li, sirtou bann pli zenn pou aksepte sa diferans-la. 

Depi laz 2 an, li soufer denn andikap (infirmité motrice cérébrale), me apar so bann paran kinn touzour soutenir li, linn fer fas a boukou diskriminasion. Bann lezot manb so fami inn touzour fer li santi li diferan. Kan li ti lekol, bann lezot zanfan ti riy li, ek bann professer ti konsider li diferan ek ti met li apar dan klas. Kan li ti anvi poz kandida pou eleksion dan so vilaz, dimounn pann krwar dan li. 

Sa tinn bles li, me zordi, linn anvi montre par so perseverans ki malgre so andikap, li kapav fer boukou zafer ek resi dan lavi. Zordi li determine pou amenn enn nouvo regar lor bann sitiasion andikap. Linn anvi inspir lezot ek montre ki enn andikap li pa anpes enn dimounn viv ou reisi dan lavi.

Linn dekouver so bann premie tas kan li ti ena 9 an. Namrata Ramkorun, se enn zen fam avek lanbision ki afirm li avek so vitiligo. Konfiant ek kouraze, linn swazir pou vinn enn mannkin pou inspir bann lezot zenn pou suiv zot bann rev ek explwat zot potansiel otan ki posib, malgre bann obstak lavi.

Li konsidere ki linn gagn boukou sans avek vitiligo kinn ouver boukou laport pou li e kinn met bann zoli loportinite devan li. Li insiste ki enn diferans se plito enn kalite ki rann nou inik, ki rann nou pli for… Enn diferans ki nou bizin aprann valorize pou ki li fer nou avanse.

Damien Laventure inn dekouver so vitiligo kan li ti ena zis 9 an. Koumansman li pa ti fasil pou viv avek sa kondision-la parski li ti ankor tro zenn, me avek led enn sikolog, linn resi aprann asim so kondision lapo ek viv enn lavi normal malgre bann regar.

Zordi, Damien se enn gran vivan ki selebre fierman so diferans toulezour. Li enn vizaz anblematik dan domenn mannkina kinn gagn la sans ranport tit Gold Model Face kinn permet pou amenn enn nouvo regar lor vitiligo : enn diferans ki inik, ki fer bote enn dimounn.

Ant zot, ena zis lamour depi premie zour… Sandrine ek Faimano, se de fam fier ki selebre zot diferans toulezour. Alor ki zot partaz enn mem pasion pou domenn odioviziel, bocou konn Sandrine osi kouma enn aktivist dan lalit kont diskriminasion.

An tan ki manb kominote LGBT, zot trouve ki ena enn gro mank reprezantasion dan sosiete morisien, e ki zot pena mem drwa ki bann lezot sitwayin, sirtou an tan ki koup.

An tan ki anbasadris, Sandrine ek Faimano swet kontribye dan ledikasion la sosiete, donn enn koudme pou eliminn bann prezize ek an mem tan enkouraz lezot dimounn ek koup pou afirm zot lidantite.

Edric ek Léonie represant bote enn lamour ant de leker depi de diferan kominote. Kot kiltir sinwa ek kreol inn zwenn ek inn vinn enn sel malgre tou bann kontrint sosial ek relizie. Depi premie zour, zot diferans pann anpes zot pou viv zot lamour ou mem selebre zot relasion lor zot bann rezo sosial an tan ki inflianser morisien.

Zot krwar ki nou tou bizin suiv seki nou leker dezire parski lamour ek boner pa depann lor kouler lapo ek kiltir. Li nou devwar ki nou defann, selebre ek asim nou bann santiman devan tou bann ideolozi sosiete.

Zour linn aret marse, dimounn ti pe dir ki so lavi inn fini gate ; me linn swazir pou pa krwar ladan. Jean François Favory, se enn manb lekip national basketball Moris kot li viv so pasion avek so fotey roulan e kinn swazir pou viv enn lavi normal ek soutenir tou bann seki an sitiasion andikap ek aprann zot vinn indepandan. Li osi milite pou linklizion bann atlet andikape dan domenn sportif.

A traver sa kanpagn-la, li anvi ede pou donn plis vizibilite lor realite bann dimounn andikape ek kontribye dan ledikasion la sosiete konsernan zot bann drwa an tan ki sitwayin morisien.